其實投資，係要做一啲反多數人嘅事先至可以賺錢，而且今日你坐擁啲乜，係睇你幾年前做左啲乜野，唔係上星期上個月或者上年。睇落去好易，我見最多情況係，朋友無知嘅一句說話就將你打沉。所以，以下主人翁係抵佢哋賺。呢篇文章主要講，我喺日本認識嘅朋友以前嘅生活，同而家生活嘅分別。

留意日本物業喺311大地震嗰一年， 因為日本嘅經濟走勢，就好似當年香港經濟一模一樣，只係拉長咗好多倍，香港當年因為樓市炒爆咗，由97年跌到03年，最後係以沙士終結成個跌浪。

日本樓由90年代初，一路跌到當年2011年，咁啱又有311大地震，最神奇相似嘅地方，係天災果年，最後埋單樓價係上升並不是下跌。

當年，香港仲未有日本物業中介，想買日本樓難度非常大，而且去到日本，好多中介都唔係好理你，買咗亦冇人跟手尾，所以都仲係擺咗喺watchlist。2011至到2013年中， 日本樓都仲係上上落落，但從來冇離開過我眼球， 2013年尾，我終於發現原來唔係淨係我一個有留意日本樓，仲有大班台灣人 。

再加上之後一個泡咗湯嘅計劃，2013年至今我認識咗好多日本朋友，為我建立咗好多人脈。

有啲亦成為我喺日本借貸嘅擔保人，唔好以為容易。喺日本你搵過當地嘅日本人擔保一個海外人，真係除非你同佢結咗婚，先至叫做有機會。至於大家睇到呢度覺得點解咁筍，有日本人肯擔保你？事實係你哋幻想唔到，我係付出幾大嘅代價！呢啲我喺往後嘅日子再慢慢分享。

有幾個日本朋友值得介紹，佢哋都幾代表日本經濟而家嘅情況。

朋友A

佢身高都有一米八幾， 骨肉均稱 ，自己做生意，生意係三代傳落嚟，基本上佢冇得揀，一定要繼續做落去。最慘係呢一行係超級傳統行業，就係日本紮染，即係幾百年前有條河不斷有水流動，之後將啲衫染一百幾廿萬次，仲要用人手。

好明顯去到今時今日，叫做係一啲小眾而且得個貴字嘅玩意，我認識佢嗰陣，佢係揸住一個爛嘅公事包，著住一對舊到你以為著咗廿年嘅皮鞋，雖然著西褲，但係個屁股位置坐到起曬鏡面，日本人嚟講佢都算潦倒至極。

當年我雄心勃勃話畀佢聽日本經濟將會好起來，而且記得賺到嘅錢都要買日本樓，你會幻想到究竟佢係乜嘢反應。因為喺日本只要你係30至40歲 ，基本上由畢業開始你都未見過乜嘢叫經濟增長。同香港相反，老竇老母都唔會想你買樓，買樓就係衣冠禽獸、食碗面反碗底 、賣國賊、 自作孽、 賤格下流卑鄙、 妖孽 !

但喺我眼中，呢啲反應先至穩藏著巨大利潤，2014年開始佢盤生意越行越順，佢自己話都唔知點解，我都無謂再同佢上堂。因為始終語言嘅障礙，破壞咗大家嘅關係就唔好啦。但我重複提醒佢記得買返日本樓，至今佢買咗十個單位左右，每隔一兩個月佢就會飛嚟香港同我見面，每次不斷多謝同埋感激 ，其實我只係舉手之勞，如果唔係個計劃截停咗，我自己都有個人利益係裡面，不過呢種感恩嘅情懷，我覺得香港真係搵唔到。

朋友B

佢係一個識聽廣東話，但係唔識講嘅日本人，識佢嗰陣未結婚，講到好多嘢撈咁，但係似乎冇正職，以佢古惑仔嘅性格，如果行咗條歪路，我覺得對社會係有破壞性。有一晚大家浸溫泉，我好語重心長咁同佢講，日本嘅經濟就嚟會反彈，而且將會超過25年，你行條正路再撘不動產，你一定唔會窮，如果你而家身家唔多嘅話，可以用少少本錢去做一啲旅遊相關嘅事業，然後賺到嘅錢就全部用嚟買返當地樓。

由於佢知我係邊個， 所以我嘅一字一句佢都記得好清楚，甚至乎幾年後見番，都仲可以一字不漏講番我當年同佢講嘅說話，當然好多廢話都係亂咁噏啦。憑住佢滑頭仔嘅性格，佢做咗日本導遊，海外遊客嚟到日本就搵佢周圍帶購物，當然收好多回佣啦。算啦，點都好過行古惑。

喺日本大阪，基本上冇乜秘密。而家佢結咗婚，生咗兩個細路。其中一個十個月大嘅小朋友，已經揸住大阪一棟嘅物業，裏面有27個單位收租，送畀佢嗰個梗係佢老豆啦。我朋友話，想佢第日大個生活有保障。

朋友C

當年個計劃截停咗， 我將啲人脈同埋方法承傳咗畀呢個朋友。宜家日子有功，佢已經喺日本多處地方，揸住唔少比較大型嘅物業，包括酒店、商場，市值大概20幾億港紙，而佢哋起始資金只係3000萬港紙左右，因為日本嘅借貸同香港銀行相反， 當你還款紀錄良好嘅時候，可以再借多啲畀你，形成一個良性循環。

朋友D

當年呢幾個朋友同我一齊討論日本地產嘅時候，呢位朋友顯得好焦急。因為其實佢係一個中國人，喺日本發展。坦白啲講喺中國撈唔掂，希望離鄉別井 生活會好啲，佢份工就係最低工資25萬yen一個月。

問我睇住個樓嘅牛市佢可以點做 ?

因為佢真係冇乜錢， 又揾唔到錢 ，又未申請到永住 。我就話畀佢聽， crazy啲咁諗 ，你不如娶個日本人做老婆 。搏政府可以快啲批永住畀你 ，然後揸住永住嘅資格，你就可以申請到按揭。

冇諗過佢真係咁樣做咗 ，個女人仲要係圖書館嗰度搭訕返嚟 ， (關於日本女性嘅性格 ，第日再開新文章再講) 而家每個月收到嘅租金係200萬yen。當然所有物業都仲未計呢幾年巨大嘅升幅， 我真係好感恩喺日本遇到好多好嘅人，佢哋喺好多方面都幫咗我好多，喺香港亦都多謝啲中介，幫我搵咗咁多筍盤， 四成係自己眼光同運氣，其他都係你哋幫我嘅。

日本而家嘅經濟，我覺得係集中畀一班做生意或者有投資地產既人富起來，去到日本你根本唔覺得經濟差，而家幾十萬可以喺地鐵站幾分鐘距離買到嘅單位，仲要收到七八厘( 唔係嗰啲搵笨柒，新樓保證7厘，係真真正正市場承受到嘅租金)，仲要唔係落後國家( 唔係越南、柬埔寨、泰國、菲律賓、馬來西亞嗰啲) ，仲要係日本租客，仲要而家係日本經濟嘅谷底，我覺得十年後係會貴過而家香港嘅物業，呢個只係常識唔係高深嘅學問。