呢排少出咗寫日本物業嘅文章， 因為好多讀者留言畀我 ，我忙住回覆佢哋 ，答咗大半個月，發現好多問題可以歸為幾類。等我之後慢慢再同大家研究分析同分享。

有一大類就係好多人問點樣搵一個靠得住嘅經紀？之前已經講過點樣為之一個好嘅經紀，呢個唔再重複。以如果靠得住嘅意思，係佢比較難啲執笠，咁就要睇其他嘅數字。

認識小弟比較深嘅讀者，應該會知道小弟係唔會睇間公司嘅裝修有幾豪華，亦唔會理係咪喺甲級寫字樓度開公司。有讀者睇到呢度應該以為係睇佢每個月開幾多單生意？其實呢個睇法都係錯。

因為小弟睇嘢會先估到最差嘅情況出現，就係每月一單生意都冇！而佢又守到，咁先至係最穩陣。睇到呢度應該好多讀者窊晒頭。每個月一單生意都冇點樣守盤生意呢？

其實大家唔好忘記，啲中介仲有一個食之無味、棄之可惜嘅租管業務。因為小弟曾經有試過將租管攬返嚟自己做，發覺係超級無效率，最終放棄咗畀返中介管算。所以我好清楚究竟邊啲中介一無生意要準備結業，邊啲中介就算冇生意都應該唔會執笠。

如果只係計租盤生意，基本上要管理250個盤，先至係一個打和點。有數得計，假設平均五萬yen租一個月，總共250個盤，就會收1250萬租金，租管費用係5%，即係會收到62.5萬日元，呢度坐底要請兩個日本人，當最低工資計，已經冇咗50萬yen，仲要租office，仲有昂貴嘅電話費。因為日本係每個call去打去計錢，未計文件往來，塞屎渠、爆水管、冷氣機滴水、交管理費、交修善積立金、交稅等。仲有香港亦都要有個對口文書工作人，計埋資金要有日本調過嚟，或者有時要香港回返啲資金去日本。

管理250個租盤基本上只係租管呢部分打和，如果中介公司根本冇呢一個數，基本上唔使幫襯，因為都係比較容易守唔到。(之後每百五個盤就最少要加多一個人去處理。)

至於幾多先係真係好難執笠，我估計要750個租盤以上，咁樣先至長遠唔會執笠，所以一人公司或者新開嘅公司，基本上睇都唔使睇，諗都唔使諗，費事第日超麻煩，話知你講到自己背景有幾勁。

當然呢個數據係以小弟嘅能力去計算，假設有啲人可以一個管過千個單位，咁呢啲係佢哋能力真係好強。而小弟就計唔到佢哋嘅數。