對初心者嚟講，我覺得住宅係四平八穩、可攻可守嘅一個投資項目。

呢篇文章想跳一跳級，如果你係初初投資日本樓，唔好心高氣傲 。但如果你對投資日本樓有一定經驗，可以進取少少。

由91年去到2015年，呢二十四年裏面，因為經濟唔好，新樓嘅供應冇泡沫年代咁瘋狂。所以住宅嗰方面嘅供應，總共只係上升咗23%。店舖位上升咗15.6%。但係辦公室喺呢24年裏面，只係多咗1%。

呢個情況係香港都出現過，就係97年至到2003年，香港嘅街舖亦只係多咗1%。結果係點大家應該都知道，冠華鏡廠呢啲隱形富豪家族就係咁樣煉成。

日本如果經濟好，再加日本人開公司做生意，政府就借500萬yen比你去鼓勵創業，兩樣加埋應該會挾升左辦公室嘅呎價，其實大阪呢三年辦公室嗰個呎租無聲無色咁爆升左幾成，仲要呢幾年大阪好多企業細辦公室搬大辦公室，因為大部分都搵唔到合適嘅大單位，竟然十居其九要斷開幾層，咁你就知個供應少得幾可憐啦。

小弟一開始投資日本樓嘅時候，辦公室係佔組合三成。而家只佔幾個%。(唔係我停止購入，而係根本冇盤畀我，有好多經紀行話開舖至今根本未收過辦公室嘅盤。)尤其是啲較大型嘅，絕對可遇不可求，最近嗰幾次買到辦公室，都係因為個賣家急需現金週轉，如果唔係我可以幾日內畀曬所有錢，基本上都唔使旨意買到。重點係爆升起上嚟一定係火車頭，如果買中地點，單位唔好太細，都幾有把握可以升十倍以上。( 以我所知大陸人仲未識得買辦公室)