講到奶嘢，小弟絕對係專家，因為小弟為求安心搵出一個可靠嘅經紀，我嘅策略係漁翁撒網式，優勝劣敗即刻一目了然。

好多奶嘢位係自己諗都冇諗過，例如有間落廣告落得好犀利，聲稱係大型嘅日本中介，試過為咗慳錢慳成本，用一啲嘢雞律師樓，結果我係買空氣！即係買咗樓，但樓契喺律師樓到唔見咗，結果要搞到差啲報警，搞咗半年賠錢就算，但其實我係損失咗增值嘅機會。

另外亦有一間，保險經紀式請人嘅日本中介，亦不遑多讓，樓契係有嘅，個名都係我嘅，但個地址唔啱，絕對唔係我買果間。都唔緊要，唔好遊說我食咗去，唔使再話比我聽買錯嗰個樓盤有幾咁好，最後又係浪費咗幾個月時間，攞番原本果舊錢。

仲有一間真係比較失望，因為喺世界各地都覺得幾好，唔知係啲員工問題，定係個老闆心態係咁？專門推啲得個90至120呎嘅細單位畀人，雖然係啲豪宅區，但係豪宅區嘅納米樓，以小弟嘅認知係好難沽得出，亦好難出租畀人。呢啲係泡沫頂峰遺留落嚟嘅產物，一早唔應該喺呢個世界上面出現。每日都有新嘅二手盤推出嚟，點解我啲朋友買親都係得啲90呎嘅超小型細單位？除非有心咁樣揀畀客人啫。更甚者，每次租金提款收成千幾yen手續費，收銀行手續費就聽過，攞租金嗰陣時收提款手續費仲要千幾yen真係聞所未聞！

仲有好多太細型嘅日本中介，成手都係垃圾盤，究竟係佢哋鍾意賣垃圾呀？定係日本嗰邊淨係畀啲垃圾盤佢？我真係搞唔清，因為每日send廿幾個垃圾來，我淨係睇都已經嘥廿分鐘，你諗下幾浪費大家時間？仲有啲就係冇腦嘅中介，賣出個樓盤後冇諗辦法點樣幫我慳税！

我同一棟樓試過揸住兩個單位，係來自兩個唔同中介，賣出嘅時間係一樣，買入時間有啲唔同，我賺得多啲嗰間，係零税！賺得少啲嗰間反而交咗3成税，分別只係因為個中介唔夠專業唔識得搞稅務，結果升得少啲嗰間反而賺多！升得多個間，差唔多少左四成嘅利潤，每一百萬利潤就變70萬，賺少30萬，日本政府真係要多謝呢啲中介。

比較好嘅中介，係有企喺我角度去諗，想盡辦法令到我唔使交稅仲要係合法嗰種，結果投資日本樓的稅項支出，仲少過香港樓。呢啲唔係傳媒嘅錯，只係佢冇可能研究到咁深入，要深入到真係買層樓兩三年，先至會知個遊戲點玩。不論中港日台美加星加坡，甚至全世界都係一樣，眼看未為真。