呢個問題係對上幾篇文章提到，某個海鮮鋪嘅老闆，都有問過，我嘅答案係問佢點樣做？因為可能佢個方法，同我諗嘅方法唔同，結果佢搞到上曬雜誌，呢個之後再講。

究竟做唔做air bnb好？呢個其實係兩個 問題。第一，係咪你自己經營民宿？第二，係咪用你間樓去經營民宿？呢個係兩個問題 。

如果乜都唔理的話我係極度贊成。過唔係自己做，係畀民宿公司做，將經營風險轉嫁畀經營者而唔係業主自己。

點解咁講呢 ？因為首先唔理法例，你做大廈可唔可以做民宿，取決於管理處有冇人理你，你點樣知管理處有冇人理你？只係得兩個方法，第一睇下有冇人喺嗰棟大廈已經做緊民宿而冇事。第二就係你做咗先算。睇下有冇人處理你。前者，梗係零風險啦！

但後者就風險好大 ，因為你裝修好曬買曬傢俬，上曬airbnb，然後話俾你聽唔做得，喺日本基本上會嘈到你飛起！下面會貼紙貼到你通緝犯咁！咁情況基本上做唔到民宿，要即刻放棄，結果賠了夫人又折兵。

你問我做唔做民宿，我亦會問你一個問題。你規模有幾大？如果你先得十間八間，個人又唔喺日本，我想問下你，啲清潔你點樣處理，床鋪你點樣換，仲要你呢幾間唔係集中係一棟大廈，你需唔需要有一啲儲物空間？去週轉一啲清潔用品？你需唔需要請個人去幫你執房？或者處理投訴突發性事件？除非你係集中喺一座building，然後喺同一building至少十個單位以上，再請一個清潔阿姐，坐鎮呢個building，又肯幫你長期做，咁絕對會提高你一切嘅回報，包括層樓嘅估值，否則結局就好似上咗雜誌嗰個海鮮老闆咁，多咗幾厘回報，而果幾厘回報係需要費心經營，咁不如搞個另外一盤生意吧！呢個唔係投資，係做生意。

我個建議係要食民宿呢一陣風，就一定要同經紀講，租畀搞民宿嘅公司，當然租金係定一個比市場價高少少，一般搞民宿嘅公司，只要係吉室，嗰棟樓佢哋衡量過覺得搞到民宿，咁就會同你做，過程非常爽快。當然太細或者年資太少嘅經紀行，係冇呢一項服務啦，你做下功課，一定會問到。

租咗俾人搞民宿提高咗租金回報，估值升高，再買畀大陸人。我覺得呢個行動非常合理。但係都係嗰句，符合搞民宿嘅日本樓，冇大家想像中咁多，所以我認識嘅朋友中，通常結果都係撞板多過食飯。