進入互聯網資訊爆炸年代，好多資料嘅來源，同埋究竟用邊種資料去作決定，成為咗投資勝負嘅關鍵。

互聯網唔一定係最可靠，亦唔一定係最唔可靠。睇你咩時候用，同埋知唔知成個流程係點，仲有用嚟做乜。舉個例，曾經有個好熟嘅朋友，問我關於買相機嘅資料，我介紹咗好多自己用開嘅sales，甚至乎好熱心咁樣，你買咩鏡頭就用邊個sales，你買乜野相機就搵邊一間舖，如果你想平就去邊一間水貨店 ，呢啲都係我自身經歷同埋一路累積落嚟嘅小知識。

點知果位朋友以為自己好醒，買咗本雜誌跟住睇，坐响屋企就叫格價，跟住落到舖頭，覺得嗰間舖頭平過雜誌個價好多，就即刻扑鎚，結果原來佢用咗行貨架買左水貨機，坐底買貴咗萬幾蚊，買貴咗唔係一個問題，而係佢做功課又白做，有曬啱嘅資料畀佢又唔用，咁樣至係核心問題。

我只係拋低咗句，雜誌一定set個價係比市價更高，因為令到啲舖頭容易啲做生意，呢個基本常識，唔通幫你真係格到全場最抵價咩，其他人點做生意 ？唔係冇做功課，而係做錯功課。

另外亦試過唔少朋友身體唔舒服，叫我介紹醫生畀佢，而我介紹嗰啲醫生收費都比較高，但係真係醫術一流 ，搵唔到代替品，所以抵佢咁貴，重點係醫得好你。但唔少朋友都會上網search，結果comment就話佢係收得太貴，跟住數落去嗰啲問題其實都係圍繞著一個問題，就係收得太貴，最好好似聖人一樣 ，免費義診，咁就乜都好 。

小弟會用網絡 ，但唔會盡信網絡，因為網絡世界成本太低，你一句我一句，好容易將事實扭曲。人好得意，有啲人相信網絡上面嘅一字一句，都唔相信你現實世界接觸到嘅嘢，就算個人擺喺你面前識咗幾年，都係咁話。

至於搵日本物業， 到底上網好啲定搵經紀人好啲？其實好多時候當局者迷，我打個譬如，你喺香港搵樓盤想買，你走入去中原個網站，你有冇諗過呢個盤源，係經過幾多從手續先至上到去個網站度呢 ？

又例如你係業主 ，打去中原要放盤，首先個經紀就mark低曬你啲資料，然後佢會sell下自己啲客先，未必一定擺落部機度，因為人哋出到個盤佢個佣金會少啲，當佢冇客，真係擺落部機度。後勤嘅admin都唔會即時update website。 因為唔係跑數 ，監管自然少力啲。而呢個問題只要係喺一個牛市裏面 ，其實啲中介亦都唔會用力去解決 ，點解？

因為呢個價， 雖然唔會買得返，比市場低引到個客問，你就有機會sell第二個盤，所以大家都冇用力去將啲資料update得好快。嚟到日本，日本同香港有啲唔同，因為經紀係會有一個中央嘅資料系統，係全部打通嘅。大家都喺呢個pool度羅盤，情況更加嚴重，大家都幾介意update啲資料，update係因為賣唔出，甚至乎已經賣出都唔會抆落嚟。

因為代表住佢哋嗰間公司賣得平啲，至少個客即刻搵佢，佢就多咗個機會。又或者令其他人做唔到單，咁佢亦都多啲機會。適逢而家日本物業進入一個牛市 ，情況會更加嚴重 。喺網上搵到嘅盤 ，無論地區無論售價無論租金回報可能係一年前，大部分都冇參考價值。

另外一個分別係日本文化嘅問題 ，因為日本人通常都會放盤畀就近中介，唔少中介係有自己地區優勢。 簡單啲嚟講即係獨家盤 ，當佢哋真係賣唔出 ，又或者有人真係咁得閒去update內聯網嘅時候 ，先至有機會update出去個website度，所以喺website 搵樓盤基本上我覺得係浪費時間。而且仲好容易被誤導，錯失咗搵錢良機，就好似當年巴菲特入股中石油，你而家一直上網check到個價係個六，但係sorry你睇唔到或者冇睇過日期，或者你冇諗過點解網上面有人要令你search到呢啲價錢，呢個價其實係14年前個價。