因為老友曹孟德兄，問到關於日本不動產換貨技巧 。所以先打個尖先，由level.1即刻跳到level5。

其實換貨小弟都有做呢個動作，因為小弟一開始買日本樓嗰時 ，東京嘅貨佔三成大阪嘅貨佔七成。揸咗兩年後，發現大阪嘅貨，跑贏東京番好多，所以喺上年下半年開始，我將東京嘅貨轉曬去大阪，及後因為發現一幢嘅物業潛力好高，同你爭嘅人亦唔多，所以就將一啲升幅比較大嘅細價樓，逐步 換入一幢幢嘅物業，當然細價樓有筍嘅我都會買。

其實由上年開始 ，已經多咗大陸人買日本樓，尤其上海人，佢哋嗰種買法係不問價咁掃，因為佢哋驚訝啲樓平到咁。仲有係面子問題，因為噏出去日本有層樓返到國內個感覺好威。

所以我啲貨通常都出比國內同胞，佢哋有一個特性，就係要保租兩年。小弟係一個投資者當然做事會符合國情啦，至緊要賣到好價，除笨有精。保租兩年何嘗不可？香港人唔係冇錢，而係行動力比國內人低，就算明知有錢賺、明知係機會、明知價錢平便宜，所有資料畀曬你，都可能冇下一步行動，錢 同機會永遠係流向效率最高嘅地方，亦都因為咁，內地人將來只會進一步比香港更加有錢，呢個係我客觀咁樣去睇到嘅事實。

另一個換貨要注意嘅地方就係，你一定要個地點係越玩越靚。唔好二線換二線，情願兩個二線換一個一線，甚至4個4線換1個1線。仲有要不斷留意住 唔同地區嘅成交價格，當手頭上嘅貨忽然之間不合理地升到偏離正常價，就要果斷沽出，換返其他貨。

小弟見過有一幢物業，裏面嘅單位喺一年裏面升咗三倍，兩步路嘅隔離嗰棟，個價錢係佢一半樓下。所以我即刻沽咗三間再喺隔離買咗六間。呢一筆資金租金收入即時咗一倍以上。之後搵返原因，原來只不過有一團大陸觀光客，你買我又買炒高咗成幢物業嘅價值。