原來小弟一直冇喺文字上深入分享對投資日本樓睇法， 大部分都係喺電台上面分享，當各位要搜尋返嘅時候就非常困難，有見及此由睇法開始慢慢再記錄低一啲資料。

小弟覺得香港樓近呢幾年應該會見頂同顯著回落，為咗避開呢一劫難，其實早喺三年前就已經準備，既然香港樓係一個玻璃頂，我就要喺世界其他地方搵個鑽石底，搵咗好耐，衡量風險同回報，最後搵到日本物業。

日本兩三年前，基本上冇乜地舖係做緊買賣物業嘅生意，比你搵到有地產公司，都只係做租賃服務 ，行入去問佢哋有冇買賣，好多都話唔做買賣，因為根本唔想去攞牌，一個可以做到買賣地產嘅營業執照成本都幾大，仲要交年費，如果年年買賣兩閒，個牌真係無謂囉。

而日本年青到三四十歲嗰啲人，基本上完全唔知樓價係幾多，佢哋唔知自己個張信用卡一碌就已經夠錢買樓，只知道租金係幾多， 因為大部分都只係租樓，自懂性開始阿爸阿媽都叫佢哋唔好買樓，因為89年個場泡沫，樓價基本上年年跌，直至2013年底，歷時24年，基本上跌到當地人都懵咗，令我著迷嘅係，租金竟然冇乜點變，呢個係鑽石底嘅訊號，亦係投資嘅保證。

而且日本有2020奧運再加賭場，仲有貶值帶嚟嘅投資引入，基本上萬事俱備只等時勢， 我唔信將日本嘅質素同香港比較會比下去， 亦唔信將來經濟好嘅時候地鐵站附近嘅物業，幾十萬可以買到一間。十年內，全世界最難負擔嘅樓價唔應該喺香港而應該喺日本，呢個係從質素、人、物價、政治、經濟潛力、經濟實力去分析。

我2014年開始買日本物業至今，基本手頭上冇一項投資產品係跑贏日本物業，亦為我製造大量嘅現金流，唔好咁離地，只講解散之後，當年「朋友」，輕而易舉，每個月租金收入已經五至六萬，慳慳哋一定夠洗，係香港至少要三千幾萬港紙至可以每個月收租五六萬。但當時600至1000萬樓已經做到呢個效果，未計呢幾年樓價年年升值，冇買到真係唔知點追。

暫時大方向係，每月一有資金，就撥去升值潛力高啲嘅日本不動產，d租金儲住唔返嚟，一夠錢又再買日本樓，因為日本樓係一個明顯嘅牛市，等待香港樓爆破嘅時候(要跌就應該至少跌三年)， 再大減持日本樓去買香港樓， 之前一間換十間，將來一間換一間。一上一落，財富可以相差十倍以上。