買樓係人生大事，睇清睇楚先扑鎚好應該，千祈唔好因為心急就盲摸摸落訂，今次要講5種情況，買樓前無睇清楚，中左就無得搞，唯有認命。

1. 睇樓時已察覺有電力短路問題

如睇樓時開電制，發覺開唔到燈或電器，又或更嚴重是某一些線入牆的電器開唔到(如房燈)，而業主係無cut電既…咁情況可以係有牆嚴重滲水而你睇唔到，滲到內裡藏電線嘅喉都蝕穿埋。又或屋內有「撻線」行為，即電器唔穿載在管，就咁入牆，受濕氣影響有短路情況。此情下要預不少裝修費才能修復。

2. 貼上符咒

呢個唔使講，櫃同門如有符，唔好亂撕，亦都唔會買黎亂博，除非你工餘喜愛探靈。

3. 留意西北位的牆

睇得樓多會明白方位是很影響一間屋會否漏水或易於保養嘅程度。向西北的牆，確實較易有霉菌，窗都更易滲水。因此西北的牆，唔好落咁多夾木裝飾或牆紙，相反上油漆或磚係好選擇，不過水太多嘅話，磚都可以甩。筆者都聽過條命都可以改，但屋既坐向係無得改，所以小心。

4. 窗台或窗口式冷氣機位水跡嚴重

用窗口式冷氣機，煩在有些少燥音同埋窗口位有縫會漏水入屋。如情況輕微，一般是填補物如玻璃膠硬化，只消去掉重填即可。唯有些少窗口冷氣的槽跟本滲水嚴重，呢件事要解決就要由外牆做防水開始。如睇到冷氣附近有水跡，或窗台有水，先看填補物是否還在，進一步可用鏡倒照窗外外牆情況，睇睇有冇嚴重石屎剝落引致滲水。若真係買左呢類樓，要比錢師傅搭棚出外牆同你做防水，有得救但費用高昂。

5. 大廈長年有棚架在外

此舉顯示業主立案法團很喜歡維修夾錢，或長年為此吵架不斷。呢件事好難救。