其實呢個問題某海鮮店個老闆，喺佢買日本樓前，都有打電話嚟同我討論過。而呢個問題，我當時苦口婆心話畀佢聽，應該點樣去選擇，因為我真係奶曬嘢。不過，之後唔知點解佢冇選擇聽我嘅建議，結果又奶返我奶嗰啲嘢。

我亦都係買日本樓前，諗過度過，我嘅諗法係既然啲樓喺日本，咁應該係去日本搵日本嘅中介買樓，比較安全穩陣，至少減少隔山買牛嘅機會，但有陣時自己嘅推理同現實嘅結果可以有一段距離，係一段好大嘅距離。

當年小弟非常孤獨咁樣，去到日本膽粗粗搵日本嘅agent，我可以保證我屬於最勤力睇樓個批，基本上我7日喺日本，由落機開始差唔多係十六個鐘頭至十八個鐘頭係睇樓，我唔係畀啲agent車輪，而係我車輪啲agent，每一日坐低五至六間agent，係畀我車乾車淨！由早上六點鐘睇樓睇到凌晨三點。我試過一日係睇300個盤，基本上三餐都係喺車度食飯，真係連去廁所嘅時間都冇， 喺日本嘅高速公路上面頂唔順，連埋經紀幾個大男人，真係喺個高速天橋度就地解決，喺日本呀，唔係香港，亦唔係大陸，係日本！途經嘅車，冇三十架都有廿幾㗎，好彩冇人拍片。

喺東京大阪，只要佢年資有番咁上下，我應該都有幫襯過佢哋。宜家諗返，好彩我努力睇盤，而家一收到張盤纸，我就好清楚究竟嗰個盤係咪低水，或者租金有冇偏低或者偏高。

返到嚟香港，我亦嘗試幫襯香港樓嘅中介，基本上每一間直接或者間接我都有同佢交過手，所以你話邊間好邊間唔好我心裏有數。路遙知馬力，慢慢發覺當初嘅諗法係完全錯誤，因為原來搵日本嘅中介，唔係佢唔肯幫你，而係當佢忙嘅時候一定處理咗日本裏面嘅問題先，然後先處理海外問題，咁基本上你好多出租嘅時機、裝修嘅時機、買賣嘅時機都會錯失。更加大嘅問題，係稅務問題，因為佢哋最多頂籠都係識得日本嘅稅制，唔會清楚香港嘅稅制，以香港同日本嘅稅制互相之間係有關係嘅，如果識得處理，基本上你嘅利潤可以多60%以上，喺日本只會有稅就叫你交。仲有減低成本增加收入呢一個因素，因為下下飛去日本揀盤同埋簽合約，同坐喺香港去做以上嘅嘢，個成本係兩回事，再加上香港agent個租都幫你收埋返嚟香港，其實冇乜原因要去日本度搵日本agent幫手，得個搞字。

日本嗰啲agent有三種組合，第一種係日本人開，你只能夠用英文同佢溝通；第二種係日本人開請咗中國人，你要用普通話同佢溝通，第三種根本係大陸人開。

第一種基於言語上面嘅問題，基本上溝通好困難，第二種基於文化嘅問題，其實好多時候你係唔知點解要咁做，第三種你不如返大陸買算啦。當然你哋可能會話香港嘅agent又點樣攞到好盤呀，但我嘅經驗係，香港唔少好嘅agent因為成交數量比較多, 喺日本個聲譽非常之好，好多老行專都願意先畀番佢哋先，而且日本人比較欣賞香港人，呢個係出乎意料嘅優勢，我當初真係估唔到，不過近呢一年開始轉變，因為大陸人下下都係爆額申請，日本人始終會睇錢份上，香港人自己爭唔爭氣，就有待觀察。